موضوع: ازاى تجيب منخير حبيبتك الارض الخميس مارس 18, 2010 6:43 am
الأعتراف بالحب أوعى تعترف أبدا أبدا ولا تطلع من بقك أو تبان فى عنيك حتى لو بتموت ، لأن الأعتراف بالحب ده اكبر غلطه ممكن يغلطها اى شب و لو كنت عملتها خلاص فإنساها خالص و متكررهاش تانى أبدا و بالعكس فهمها إنك طلعت الموضوع من دماغك و لما بتفتكره قال إيه بتضحك
. خف تعوم خليك خفيف على قد متقدر .. متحسسهاش إنك مربوط فى رجل بنطلونها ، مش كل حته تروحها تلاقيك فيها و مش كل يوم تليفون زى مواعيد الدوا .. و الأهم بلاش لما تكونو مع جروب تقف دايما معاها هيا
. الممنوع مرغوب دايما خللى فى حجات فى حياتك ممنوعه عنها .. يعنى مثلا خللى فى موضوع يخصك مش مسموحلها تتكلم معاك فيه أو حوار يخصك سر عليها هيا بالذات .. الموضوع ده هيجننها بيك
. شد و إرخى أنا عارفه إن إللى بيحب حد بيبقى محتاج يطمن عليه طول الوقت و يدلعه .. إعمل ده بس مش كتير لكن حاول تعمله بطريقه مميزه .. متبقاش طريقة دلعك ليها تقليديه ، و بعدين اهم حاجة بقى متمشيش على وتيره واحده طول الوقت زى الشريط السافف .. خليك حبه حنين اوى و مهتم على الأخر و حبه تنفيض
. عم المهم لازم تكون فى نظرها عم المهم .. لازم يكون لك اصحاب كتير من كذا مكان و يا ريت بقى لو من بلاد تانيه ، بنات و ولاد و كلهم يكلموك فى التليفون قدامها .. و فهمها دايما إنهم بيسألو عليك و عايزينك تقابلهم و تروحلهم و تخرج معاهم .. و كلمها فى التليفون كل مرة من حته شكل و مع ناس غير الناس .. عشان تحسسها بقيمتك و تحس إنك مش مقطوعلها
. الموبيل سر النجاح الموبيل ده بقى حوار تانى خالص .. يمكن يكون أخطر سر .. إوعى ترد عليها من أول جرس ، الحكايه دى وحشه فى حقك أوى زى ميكون مصدقت ، مشيها مره ترد و مرتين تلاته مكنتش سامع التليفون و خللى أعذارك دايما جامده ، بلاش حوار كنت فى الحمام ده .. لأ خليها كنت فى حفله و المزيكا عاليه أو كنت بجيب عمى من المطار و كنت رامى الموبيل فى دواسه العربيه .. يعنى المهم تستنضف اعذارك .. و حاجة كمان مهمه .. حاول على قد متقدر لما يجيلك موبيل رد و قول ألو و قوم واخد موبيلك و تبعد بيه خطوتين تلاته عنها ، يعنى بلاش تبقى كتاب مفتوح قدامها
. الأعتذار القاتل لما تيجى تعتذر بلاش الإعتذار إللى بضمير ده ، متحسسهاش إنك هطعيتلها عشان تسامحك ولا إنك غلط فى البخارى .. إعتذر بذوق و رقه و كرر إعتذارك أكتر من مره لحد ما تسامحك لكن بلاش مسكنه و ضعف .. و حسك عينك تقولها جملة ( انا مش هعمل كده تانى ) .. لأن دى جملة اطفال مش إعتذار راجل أبدا
. متسكتش على حقك لو هيا غلطت فى حاجة إعترض و إغضب و إمشى و سيبلها المكان كمان لكن متتنرفزش عليها و إوعى صوتك يعلى عليها قدام حد أبدا و حذارى تقفل التليفون فى وشها مهما كنت غضبان لأنها مش هتعديهالك و حافظ على مفرداتك ، يعنى بلاش تطلع دبش لكن فى نفس الوقت حسسها إنها بتتعامل مع راجل يعنى لازم تحاسب على تصرفتها .. متسمحلهاش تصغرك قدام أى مخلوق
. سيطره و تحكم الغيره أكتر حاجة ممكن تكرهها فيك أو تحببها فيك .. ده على حسب إستخدامك ، بمعنى إنك مطلوب منك إنك متغرش عليها خالص حتى لو جت قالتلك إنها معجبه بواحد تانى ، ساعتها إبتسملها و قولها ( مدام عاجبك خلاص يبقى عاجبنى بس يا رب يطلع راجل عشان انا مبحبش الشباب المايص ) و جاريها فى الكلام كأن أختك بتكلمك .. متغرش عليها غير فى حاله واحده بس إنك تحسسها إن ده خوف عليها مش أكتر لأنها زى ما إتفقنا .. زى اختك بالظبط
. بلااااااش نكد مفيش حاجة تقرف البنت اكتر من الولد النكدى ، إللى بيزعل من أقل حاجه و يقلب وشه ، أو يكون ملوش فى التهريج و التنطيط و التنكيت و الرقص ، الولد الروش إللى بيهرج و كل الناس بتحب خفه دمه ده بيبقى ولد لقطه و ميتسبش .. و لو إنطبقت السما على الأرض متخليهاش تشوف دموعك لأنها حتى لو تعاطفت معاك و صعبت عليها عمرها مهتعتبرك راجل تانى أبدا
. مفرداتك بتحدد مصيرك يعنى مثلا خلى كل جملك و إنت بتكلمها يتكرر فيها الكلمات دى ( إنت بتكلمى راجل مش حاجة تانيه ) ( و غلاوتك إنتى عندى الكلام ده محصلش ) ( إنتى بالذات : مقدرش على زعلك / مقدرش أرفضلك طلب / حاجه تانية عندى .. إلخ ) ( محدش يقدر : يكلمنى كده / يرد عليا وحش / يزعك قدامى .. إلخ ) ( ده حوار مش مهم ) ( مدام انا هنا متقلقيش ) ( إنتى عارفه إنك معزتك من معزة أختى الصغيره بالظبط ) و بلاش بقى الكلمات دى ( براحتك و إللى تشوفيه ) ( و حياتى عندك أو عشان خاطرى ) ( يعنى اهون عليكى ؟؟ ) ( يا بنتى / يا ماما ) سيبو الجمل دى للبنات بلاش إنتو تستخدموها
. الضربة القاضيه ده بقى الإمتحان الأخير و مفيش بعده كلام تانى بعد متجرب كل الكلام ده هتحط فى دماغك بنت معينه و تكون كويسه اوى ، حاجة كده من على وش القفص ، و إدى حبيبتك كل الأسباب إللى تخليها تغير منها ، و مش تغير و بس لأ .. تولع و تشيط .. بس بشروط أولا : متبقاش أوفر ولا تدلق على البنت التانيه دى أوى عشان حبيبتك متكرهكش ثانيا : تكون البنت التانيه فعلا مشدودالك على الأقل ثالثا : حاول تعمل مع البنت التانيه حوالى تلاتين فى الميه من إللى بتعمله مع حبيبتك ، يعنى مثلا الخروج و الإهتمام و التليفونات رابعا : لما يجيلك تليفون منها إبعد عن حبيبتك و خلى وشك فرحان أوى و إنت بتكلمها زى ميكون بتكلم ليلة العيد خامسا : نفض لحبيبتك و لو مره واحده و إعمل أى نشاط مع البنت التانيه
و بعد كل ده لو غارت عليك و أكيد هتغير و هيبان ده عليها مهما حاولت تخبيه .. ساعتها بس ممكن تعترفلها و تقولها إنك معجب بيها .. و تتمنى ترتبط بيها لكن مش بتحبها و لو لقيتها متجاوبه معاك إبقى قول بحبك زى مأنت عايز لكن لو مغرتش عليك بعد كل ده ، يبقى ساعتها تعرف و تتأكد إنك متفرقش معاها و إنها لا حبتك و لا هتحبك .. و مش ممكن هتكون من ناصيبك ولا إنت هتكون من نصيبها لأنها ببساطه متستهلكش .. و فى اللحظة دى لازم تاخد قرار إنك تبعد و تتطلع الحوار كله من قلبك و دماغك لأنه مفيش فايده
و ربنا يوفقكو كلكو يا رب و يجمعكو بالناس إللى بتحبوها